Poora sach, ek page me.
Ye page marketing ke liye nahi hai. Isme literally wo sab likha hai jo DostGPT collect karta hai — kyunki mental health site par tumhe ye pata hona chahiye.
Last updated: 28 July 2026
Chhoti si summary
- Hum kaafi technical data collect karte hain — device, browser, network, sheher, aur ek device fingerprint.
- Hum kuch bhi bechte nahi — na ads, na brokers, na third-party trackers.
- Tum device tracking off kar sakte ho, neeche ek click me. Chat phir bhi chalegi.
- Hum account nahi banate — na email, na phone, na password.
Device tracking band karo
Isse fingerprinting aur saara technical data collection turant ruk jaata hai. Sirf conversation store hoti rahegi, taaki chat continue ho sake. Setting isi browser me save hoti hai.
Browser data clear karoge toh ye setting bhi chali jaayegi. Pehle se collect ho chuka data hatwane ke liye email karo.
1. Technical data jo hum collect karte hain
Jab bhi tum koi page kholte ho, ye sab record hota hai:
| Category | Kya exactly |
|---|---|
| Device | User-agent string, OS aur version, browser aur version, CPU cores, RAM (approx), touch points, device model (jahan browser deta hai) |
| Screen | Screen width/height, available area, colour depth, pixel ratio, orientation, browser window size |
| Battery | Charge percentage aur charging status — sirf un browsers me jo Battery Status API dete hain |
| Network | Connection type (4G/5G/Wi-Fi), estimated downlink speed, round-trip time, data-saver on/off |
| Location | IP address, aur usse nikaala gaya country, state, sheher, approximate coordinates, aur ISP ka naam |
| Locale | Browser language(s), time zone, UTC offset, aur local time jab tum aaye |
| Traffic source | Referrer URL (kis site se aaye), landing page, aur URL me koi utm/ref parameters |
| Preferences | Light/dark theme, reduced-motion setting, cookies enabled, storage quota |
| Naam | Sirf wahi jo tum khud chat me daalte ho. Ye optional hai aur skip kiya ja sakta hai. |
2. Device fingerprinting
Ye wo hissa hai jise zyadatar websites chhupati hain, isliye hum khul ke likh rahe hain. Cookies ke alawa, hum tumhare device ki ek unique pehchaan banate hain in cheezon se:
- Canvas fingerprint — ek chhoti si image render karke uska hash. Har graphics stack thoda alag render karta hai.
- WebGL fingerprint — tumhara GPU vendor, renderer name, aur graphics capabilities.
- Audio fingerprint — ek silent audio signal process karke uska result. Audio stack ke hisaab se badalta hai.
- Font fingerprint — tumhare system par kaunse fonts installed hain (~35 common fonts test karke).
In sabko milakar ek device ID banti hai. Iska matlab ye hai ki hum tumhare device ko dobara pehchaan sakte hain chahe tum cookies aur site data clear kar do.
Ye kyun karte hain: ye samajhne ke liye ki kitne alag log aa rahe hain (na ki kitne page refresh hue), abuse aur spam pakadne ke liye, aur pricing decide karne se pehle ye jaanne ke liye ki log DostGPT kaise use karte hain.
Ye nahi karte: is ID ko kisi third party ko nahi dete, ad networks se link nahi karte, aur dusri websites par tumhe follow nahi karte. Ye sirf dostgpt.in ke andar rehta hai.
Ye pasand nahi? Upar wale switch se turant band ho jaayega.
3. Jo hum nahi kar sakte
Kuch cheezein log poochte hain, toh saaf kar dein — browser inhe allow hi nahi karta:
- Hum dusri websites ki cookies nahi padh sakte. Browsers same-origin policy lagate hain.
- Hum tumhara browser cache, history ya saved passwords nahi padh sakte.
- Hum tumhara autofill data (naam, address, card) nahi padh sakte. Iska koi API hi nahi hai.
- Hum tumhari exact GPS location nahi le sakte jab tak tum khud permission na do — aur hum maangte hi nahi.
- Hum tumhara camera, mic ya files access nahi karte.
4. Data kiske paas jaata hai
| Kaun | Kya milta hai | Kyun |
|---|---|---|
| DostGPT ka server | Sab kuch upar likha hua | Chat chalane aur samajhne ke liye |
| OpenAI | Sirf tumhare messages ka text | AI reply generate karne ke liye. Hum store=false bhejte hain, yaani OpenAI ise apne paas retain nahi karta. |
| IP geolocation service | Sirf tumhara IP address | Sheher aur ISP nikaalne ke liye. Result cache ho jaata hai. |
| Google Fonts | IP address (font file request se) | Site ka display font load karne ke liye |
| Advertisers / data brokers | Kuch bhi nahi | Hum kabhi data bechte nahi |
5. Tumhare rights
India ke Digital Personal Data Protection Act, 2023 ke tehat tumhare kuch haq hain, aur hum unhe honour karte hain:
- Access — apna saara stored data maang sakte ho.
- Correction — galat information theek karwa sakte ho.
- Erasure — apna poora data delete karwa sakte ho.
- Withdraw consent — tracking kabhi bhi band kar sakte ho (upar wala switch).
- Grievance — koi shikayat ho toh seedha likh sakte ho.
In sab ke liye ek hi jagah likhna hai: vikasdigitalcreations@gmail.com. Hum 30 din ke andar jawaab dene ki koshish karte hain.
Grievance contact: Vikas Yadav · vikasdigitalcreations@gmail.com · +91 98879 60143
6. Bachche
DostGPT 18 saal se kam umar walon ke liye design nahi kiya gaya, halaanki AI ko instruct kiya gaya hai ki har baat age-appropriate rakhe kyunki koi bhi aa sakta hai. Agar tum 18 se kam ho, kisi bharose ke bade se baat karo — aur DPDP Act ke hisaab se tumhare parent ya guardian ki consent chahiye hogi.
7. Security
Site aur API HTTPS par chalte hain. Server par API keys restricted permissions ke saath rakhi jaati hain aur chat service ek non-root user ke roop me chalti hai. Rate limiting lagi hui hai.
Lekin poori honesty me: ye ek chhota independent project hai, koi bada company nahi. Conversations database me plain text me hain. Koi bhi system 100% safe nahi hota. Isliye phir se — bank details, passwords, ya government ID numbers yahan mat likho.
8. Is page me badlaav
Kuch bhi material change hone par ye page update hoga aur upar "last updated" date badlegi. Agar collection ka scope badha toh site par saaf notice dikhayenge.